Nork dauka idatzita abesti edo olerki baten esaldia Whatsappen? Edo Instagrameko deskribapenean? Noizbait erabili duzu kasu horietan euskaraz idatzitako esaldi bat? Askotan, euskara eskolarekin lotzen dugu, eta ez bizitzako beste momentuekin. Zergatik ezin dugu erabili euskara horrelako kasuetan? Batek daki, horrelako gauza txikietatik hasi eta euskara gure eguneroko bizitzan erabiltzen amaitu dezakegu! Jarraian, Miren Agur Meaberen olerki bat irakurriko duzu. Gustatzen bazaizu, euskaraz olerki edo abesti gehiago bilatzea proposatzen dizut Instagramen argitaratzen dituzun hurrengo 7 argazki-oinetan idazteko.
Gogoratu: HIZKUNTZA BAT EZ DA GALTZEN EZ DAKITENEK IKASTEN EZ DUTELAKO, BAIZIK ETA DAKITENEK ERABILTZEN EZ DUTELAKO.
GAUA ETA GATZA
(Klimten Musua pinturari begira)Miren Agur Meabe , 2008
Egunen batean esnatuko banintz, kasualitatez,
—kasualitate hutsez diot—,
zure besoen artean,
ez presarik izan, ez begiak ireki.
Emadazu pa masailean,
ez dira-eta urrun izango huntzorria, lore urrekarak
Emadazu musu eskuekin,
itsuka.
Garbitzaileen kamioiak eramango du,
benetako zaborrekin nahastuta,
gure gauaren zelofana.
Gatza emango dizut nik gosari,
urre zuria.
Gure bihotz pisuek flota dezaten, arindurik,
ezinaren bainuontzi erabilian.
