MOTA Irudikapena – Begiespena

MUSIKA La Misión – On Earth as It Is in Heaven

NOLA EGIN

Erlaxazio-irudikapenerako teknika aprobetxatuko dugu Eguberriaren misteriora hurbildu ahal izateko. Kontakizuna ezagutzen duzunez, artzainetako bat izango zara. Har ezazu oinarrizko jarrera.

Irudika ezazu artzaina zarela, zerupean egiten duzula lo, baina adi, ardiak zaindu behar dituzu eta. Izarrak zeruan, hotz egiten du agian… Baina ezin duzu lorik egin, kezkatuta zaude, abailduta. Oso pobrea zara, ez zara ardien jabea, ez duzu etxerik, ezta jatekorik; jendeak gaizki begiratzen dizu, mesfidantzaz eta arbuiatu egiten zaitu… Horrek guztiak bakar-bakarrik eta triste sentiarazten zaitu gauero (etenaldia)

Orduak aurrera doaz eta lo egin barik jarraitzen duzu, baina sentipen arraro bat duzu, azaltzen zaila baina berezia den zerbait. Altxatzen zara eta ikusten duzu inguruko beste artzainak ere zutitu, hitz egin eta abiatzen direla. Haiei lotzen zatzaizkie, ez dakizue zer gertatzen ari den, baina intuizioak itxaropena piztu dizue zuen barnean eta herrirako bideari ekitera bultzatzen zaituzte

Inguruetan, herrira iritsi baino lehentxeago, jendea dago gau askotan abereak utzi dituzuen leize batean. Bikote bat da, gazteak, baina emakumea ama izan da. Pena ematen dizuete, zuek baino pobreagoak eta zuek baino baztertuagoak direla iruditzen zaizue. Horregatik hurbildu eta lagundu egiten diezue. Pozik dirudite. Erditzearen arriskua pasatu da eta dena bide onetik doa. Irria kutsatzen dizuete, gerturatu eta haurtxoaren alboan esertzen zarete. Beti lastoa botatzen duzuen aska batean dago umetxoa! Umeari begira geratzen zarete. Haurtxoa hain da hauskorra ezen samurtu egiten zaituzten eta ezin diozuen begiratzeari utzi. Bertan gelditzen zarete, umeari begira eta guraso berriekin hizketan. Gutxi hitz egiten duzue, baina oso gustura sentitzen zarete. Umearen samurtasunak eraldatu egiten zaitu. Zergatia jakin gabe, gauaren larritasuna desagertu da. Nahi baduzu har dezakezu umea besoetan. Mariak baimena ematen dizu begiradaz. Zuk, ardiak eta ahuntzak besterik ezagutzen ez duzunez, zer egiten duzu haur jaio berri horrekin besoetan? (etenaldia)

Denbora aurrera doa, aro berezia, adiezina, magikoa da, baina joan egin behar zara. Umea askan utzita agur esaten diezu. Landetara doan bideari ekiten diozu, ardiak esnatzen hasi dira. Eguna argitu bitartean urruntzen zara. Zer gertatu den, zergatik ez dakizu, baina badakizu zerbait aldatu dela zure barnean, zugan bake eta zoriontasun berriak piztu direla, itxaropenak zure beldurrak aldatu dituela. Bizia ederra dela sentitzen duzu, merezi duela, artzain hutsa izanda ere haurtxoak eta haren familiak maite zaituztela eta sentipen horrek dena aldatu du. Gogoratzen dituzu, haiekin eman duzun denbora ere bai. Sentitzen duzu haiek zugan idatzi dutena ez dela inoiz ezabatuko. Zergatia ulertu barik, altxatzen duzu begirada, besoak zeru argira eta eskerrak ematen dizkiozu Jaungoikoari behin eta berriz.

Gogoeta

Azaldu sentitu edota irudikatu duzun zerbait, ahaztu nahi ez duzun zerbait.

Bestetik, Eguberriko egunetan eszena hau gogoratzera gonbidatzen zaitugu.

MODALITATEA Masajea, bi pertsonak hirugarren bati emandakoa.

MUSIKA Nightmares On Wax   Les Nuits                              EBAL.

GIDOIA

Besoetako masajea (bizkarrarena antzekoa da)

GIDOIA  eskuetako masajea (bizkarreko masajearen ezaugarriak gogoratu : ots.3)

Pertsona bat eseriko da eta “oinarrizko jarrera” hartuko du masajea hartzeko. Bizkarra zuzen jarriko du, besoak luzatuko ditu eta arnasketari erreparatuko dio masajea hobeto hartzeko. Bere ondoan bi ikaskide egongo dira eta prestatuko dira beso banatan masajea emateko; 10 segundotan eskuak igurtziko dituzte berotu arte.

Eskuak prest dituzuelarik, barnea prestatzeari ekingo diozue: zuen ikaskidea zaintzeko nahia, lasaitasuna “oparitzeko” nahia… zuen eskuek pertsona hori bedeinkatuko dutela pentsa dezakezue, gure eskuen bidez Jainkoak maitasuna zein ontasuna helarazten dizkigu. Prest zaudetela uste duzuenean masajea ematen has zaitezkete.

Masajearen faseak:

1.- Besoa berotu, horretarako zuen esku-azpiak lagunaren besoetara hurbilduko dituzu, oso gertu baina ia ukitu barik. Horrela masajea hartuko duenak zuen eskuen hurbiltasuna nahiz beroz nabarituko ditu. Segundo batzuen buruan har iezaiozu besoa eta igurtzi.

2.- Besoa oratu. Besoa berotu dituzuenean, har iezaiozue beso bana eta hasi ferekatzen, oratu nahiko bazeniote bezala. Sorbaldatik hasiko gara, eskuetara heldu arte; amaituko dugu masajea atzamarrak ferekatuz. Hori guztia kontu handiz egingo dugu.

3.-Besoak eskobatu. Hartzailearen besoak hartu eta gorantz jarri; ondoren zuen esku-azpiak mugitu besoak eskobatu nahiko bazenute bezala, oso astiro.

4.- Energia emateko jar itzazu zure eskuak bere besoen gainean. Amaitzeko hartzaileak esango dizuen puntuan eskuak kokatu eta begi itxita horrela egon zenbait segundotan. Bitartean desio onena opa izan.

Ez ahaztu lasai egon behar duzula, “maitasunez” beterik egon behar duzu hori guztia masajea hartuko duenari emateko. Hortaz, isiltasuna ez ezik, arnasketa ere kontuan hartu beharko dituzu ariketa egin eta hartu ahal izateko.

Idatz dezagun

Nola sentitu zara? Guztiok besteen zainketak behar ditugu gure baitan daramagun politena kanporatzeko. Uste duzu zure ingurukoek zure zainketak, zure eskuak, zure irribarrea, zure hitza…behar dituztela ? Besteek euren baitan duten onena kanporatzen laguntzeko prest ikusten al duzu zeure burua? Nork laguntzen dizu zuri onena ateratzen?

MOTA Irudikatzea

MUSIKA     AMELIE La Noyée

NOLA EGIN

Irudika ezazu animalia bat  (animaliaren nolakotasunak, bertuteak…)

Basoa zoragarri bat irudikatu (Etenaldia)  apurka-apurka sarrerarantz hurbilduz zoaz.

Basoan zain duzu animalia bat. Begira iezaiozu arretaz (etenaldia).

Animaliak basoan zehar laguntzen dizu eta txokorik ederrenak erakusten dizkizu: ur-jauziak, aintzirak, kolore eta tamaina guztietako loreak, zuhaitzak… (etenaldia)

Entzun basoko hotsak… usaindu bere lurrinak… ibili eta gozatu natura (etenaldia)

Orain animaliak erdialdean dagoen ehun urtetik gorako zuhaitzeraino zaramatza. Urte askotan zehar bildutako jakinduriaz eta energiaz, lurraz eta eguzkiaz beteta dago zuhaitza. Sekulakoa da. Begira iezaiozu eta hurbil zaitez zuhaitzera. Orain besarkatu eta konta iezazkiozu zure kezkak, sufrimenduak, haserreak, beldurrak eta tristurak. (etenaldia). Sumatzen duzu bideak eragin dizun nekea zuhaitzak berak nola hartzen duen, nola ematen dizkizun deskantsua eta bakea.

Orain sentitu zure kezkak eta beldurrak desagertzen direla. Konfiantza, samurtasuna eta poztasuna agertzen dira. (Etenaldia)

Esker onez egiten diozu agur zuhaitzari eta jarraitzen duzu paseoan, baso zoragarri horri begira. (Etenaldia)

Basoaren mugaraino iritsi zara. Lagundu dizun animaliari ere eskerrak ematen dizkiozu eta agur esaten diozu.

MOTA Asnarketaren bidezko erlaxazioa

MUSIKA     Enchantement 1

NOLA EGIN

Arreta jarri asnarketan.

Orain asnarketa sentituko dugu. Egingo dugu nahi beste arnasaldi sakon, airea sudurretik hartuz eta sudurretik botaz.

Arnasaldi horien ostean, erreparatu eta sentitu nola arnasten duzun normalean, arnasketa kontrolatu barik.

(musika edo isilunea)

Aldizkako asnarketa: (hobe musu zapia eskura edukitzea)

Aldizka hartzen dugu arnasa sudur zulo bietatik. Horretarako sudur zuloak estaliko ditugu hatz lodiarekin eta hatz erakuslearekin. Hatz erakuslea  altxatzen dugu eta airea hartu, gero estali eta lodia altxatuz airea bota. Hatz lodia altxatuta, airea hartzen dugu eta sudur zuloa estali, hatz erakuslea jaiki eta arnasa bota… Horrela hurrenez hurren, presarik gabe, sentitzen airea nola sartzen eta irteten den, bere tenperatura, bere indarra, eta erlaxatu egiten gara.

Hausnarketa

Erlaxatuta sentitu zara? Zerk lagundu dizu gehien? Zerbait aipatu nahi duzu?

MOTA: Arnasketa

MUSIKA Vangelis 1492 Conquest of Paradise

NOLA EGIN

Hiru arnasketa-mailak edo motak ezagutu eta 10 diafragma-arnasaldi egin. (puztukia)

–Hiru mailak. Arnasketa osoa.

Ariketa hau arnasketa hobetzeko erabiltzen da.

Hiru mailatan bereiziko dugu arnasaldia: abdominala, torazikoa eta klabikularra. Ikasi behar dugu kontrolatzen airea biriketara sartzen eta biriketatik ateratzen eta bidaltzen nahi dugun lehenengo, bigarren edo hirugarren mailetara une bakoitzeko beharren arabera:

1. Abdominala erregulartasunez eta oxigeno gehiago behar dugunean.

2. Toraziko-abdominala, oxigeno beharra are handiagoa denean.

3. Klabikular-toraziko-abdominala, birikak erabat bete nahi ditugunean.

Identifikatu ahal ditugu gorputz eta buruko sentipenak hiru arnasketa motei lotuta:

Arnasketa abdominalak egonkortasun eta ongizate sentipenak sortarazten dizkigu.

Beste biek, asaldura eta ezinegon egoerak.

-Puztukia

Ariketa honek diafragma giharra erabiltzen irakasten digu. Puztukia puztuko bagenu bezalakoa da ariketa hau: Arnasa hartzean, airea biriken azpiraino iritsi behar da sabela puztuz (puztukia); arnasa botatzean, sabela barnerantz sartu behar dugu (puztukia hustu egiten da). Sabelaldearen mugimendu hau, barnerantz eta kanporantz, diafragma giharrak eraginda da: uzkurtu egiten denean diafragma jaisten da, presioa egiten du sabelaren barnean eta kanporantz ateratzen du. Airea botatzean, giharra erlaxatu egiten da eta igo, eta sabela barnerantz sartzen da. Egin arnasketa mota hau 10 aldiz gutxienez.

MOTA Irudikapena

MUSIKA  Tubular bells

NOLA EGIN

Oinarrizko jarrera hartuko dugu irudikapena egiteko.

Bi irudi proposatzen dizkizuet nork bere gustukoa aukeratzeko: sustraietatik ura hartzen ari den ala urtzen ari den altzairuzko robota, “Terminator II” motatako bat.

Gogoratu lurrean itsatsita daudela oinak, egin kolpe txikiak hatzekin teklak joko bazenitu bezala eta arreta bildu mugimendu horretan. Sentitu uraren beharra duen zuhaitz hori zarela edo indarra eta malgutasuna berreskuratu behar dituen gorputz zurruna.  (isilunea)

Irudika ezazu zure behatzen puntako hezetasuna eta sentitu nola eraldatzen zaituen zugan sartzen den likidoa horrek. Bete zure oinazpiak orkatiletaraino, belaunetaraino, izterretaraino…

Sentitu nola freskotasunak, biziz betetako likidoak betetzen zaituen, apurka-apurka, bizitasun eta maitasun olatu batek bete eta eraldatuko bazintu bezala.

Sentitu nola betetzen zaituen gerriraino, bularreraino… (isilunea)

Nola iristen den zure sorbaldetaraino eta nola jaisten den, zure besoak eraldatzen, eskuetaraino iritsi arte, atzamar guztiak bete arte.

Sentitu nola igotzen den zure lepotik eta betetzen dituen zure aurpegia eta buru osoa.

Sentitu zure gorputz osoa likido horretaz bete-beteta, indar eta biziz beteta.

Orain ondo sentitzen zara, eguna hasteko ilusio handiz, bakez, maitasunez eta grinaz sentipen hori besteei sentiarazteko. Pentsatu nori sentiarazi nahiko zenioke zuk sentitzen duzun bakea. Imajinatu bere aurpegia, bere esker oneko begirada.

Gogoeta

Erraza gertatu zaizu? Nola sentitu zara? Pertsonaren bat irudikatu duzu?

MOTA Irakurketa – entzuketa

MUSIKA  Rene Aubry   La Grande Cascade

NOLA EGIN

Juan Mariaren astean gaude. 150 urte baino gehiago dira bere egitasmoa bere lanari jarraitzen diogun menetar askoren esku utzi zuela. Juan Maria gustura ezagutuko zintuztekeen, zuen ondoan egoteko eta entzuteko prest. Urte asko igaro dira, baina bere gutun eta idatzi asko eta asko ditugu gordeta. Ezin dugu bere ahotsa entzun, baina bai bere hitzak irakurri, gaur egun ere gauza bera esango liguke eta. Bere berbak entzuteko, bihotzetik entzuteko, “oinarrizko jarrera” hartzea proposatzen dizuet eta guztion artean berak esandakoak irakurtzea. Ados? (ikasle batek orria pasatu die besteei, beste ikasleek esaldi bana irakurtzeko).

1. “Zerbait handia egitera deituak zarete” (JM)
2. “Seme-alabok, zenbat maite zaituztedan!” (JM)
3. “Maitasuna nagusi izan dadila zuen artean, alai zaitezte besteen poztasunarekin eta pairatu besteen penak” (JM)
4. “Zuekiko dudan maitasuna ez da aldatu.” (JM)
5. “Eutsi esperantzari etsipenaren aurrean.” (JM)
6. “Esker onez gogoratu jaso duzun guztia.” (JM)
7. “Zailtasun oro aukera berria da, eskertzeko altxorra.” (JM)
8. “Itxaropena dut egunero ereindako alea haziko dela.” (JM)
9. “Gertatzen dena gertatzen dela, ez galdu bakea, ez etsi.” (JM)
10. “Pertsonetatik zoriontsuena izango zinateke mundu guztia apaltasunez tratatuko bazenu” (JM)
11. “Zailtasunen aurrean beldurtzen zara eta beldur horrek areagotu egiten ditu.” (JM)
12. “Jaungoikoa nirekin dago. Nori izango diot beldur?” (JM)
13. “Jaungoikoak ez digu sekula ere huts egiten” (JM)
14. “Maitatu eta otoitza erraza gertatuko zaizu; maitatu eta otoitzea izango da zure nahia, zure poza areago maitatzeko” (JM)
15. “Zure maitasunak, Jauna, inguratu egiten gaitu alde guztietatik!” (JM)
16. “Gehiago irabaziko duzu maite bazaituzte beldurra badizute baino.”(JM)
17. “Ez zaitez fida txalo eta laudorio errazez” (JM)
18. “Urreari zaion maitasunak bihotza gogortzen digu.” (JM)
19. “Justizia bilatzen badugu, ez dago zertan beldurrik izan.”(JM)
20. “Elkarrekin gauden bitartean indartsu izango gara, zoriontsu izango gara.” (JM)
21. “Bihotzak memoria galarazten dien pertsona horiek ditut atsegin. Ikaragarria da ezer ere ez ahaztea.” (JM)
22. “Batzuetan, apur bat triste zaudela, ongi egiten dizu maite dituzunen eskutitzak irakurtzeak.” (JM)
23. “Ez zait gustatzen arreta elkarren akatsetan jartzen dutenean.” (JM)
24. “Jesukristo ezagutaraztea eta maitaraztea, zer misio ederra! ” (JM)
25. “Jaungoikoaren lanak gerizpean baino ez dira hazten, eta gauez jausten da ihintza zerutik”. (JM)
26. “Esan esan behar duzuna, baina apaltasunez eta diskrezioz.” (JM)
27. ”Izan apalak, zuen bizitzaren apaltasunagatik irabaziko duzue-eta guztien maitasuna.” (Gabriel Deshayes)

Gogoeta:

Zein esaldi nahiago duzu? Jakingo bazenu zure esaldiren bat 200 urte geroago gogoratuko dutela, zer idatziko zenuke?

MOTA  Bistaratzea

MUSIKA  Somewhere Over the Rainbow   Israel Kamakawiwo’Ole

NOLA EGIN

Juan Mariak bazuen gauza berezi bat, bere begirada. Begirada horrek eraman zuen hainbeste egitasmo garatzera, hainbeste jende ezagutzera, maitatua izatera eta, batzuetan, umeek, gazteek eta helduek jarraitua izatera. Bere begirada, sentsibilitate bereziko begirada. Orain bizia ikusteko eta, batik bat, pertsona bakoitza ikusteko, begirada hori ulertzeko, bistaratze bat proposatuko dizugu.

Oinarrizko jarrera.

Imajina ezazu une batez Juan Maria zarela. Bai, Juan Maria zure adina zeukalarik. Saint Maloko itsas portuko kaleetan dabilen gazte bat zara.  Ilunabarrean, itsas brisak laztantzen zaitu, hotz egiten du eta segundo batzuez itsasoari eta eguzki sartzeari begira zaude. (isilunea) … Bakarrik pentsatzen duzu… Zer polita!

Zarata batek harritzen zaitu, iraultzaile talde baten oihuak eta barreak dira. Gazte bat daramate lotuta, iraintzen dute, badirudi apaiza dela, norbaitek salatu duela eta atxilotuko dute… Hurbil zaude eta bere aurpegiak ikusten dituzu. Gaztea kezkatuta eta ikaratuta dago aldi berean eta, hala ere, bare. (isilunea) …

Ez duzu ezer ulertzen, bihotza ukabil batean sartuta duzu eta zeure buruari galdetzen diozu: Zergatik egiten diote hori? Zergatik? Jarraitzen duzu kalean aurrera amorruz eta ezintasunez… eta beste galdera bat: Eta gazte hori, zergatik jarraitzen du apaiza izaten? Zerk  bultzatu du jarraitzera horrek bere bizia arriskuan jartzen duela jakinda?

Pentsa eta pentsa, S. Maloko kale ezezagunetan sartu zara, zikin daude eta arrisku sentipena duzu. Jarraitzen duzu. Hurrengo kalean biratu eta zure adineko gazte talde bat ikusten duzu. Ez zara gerturatzen, behatu egiten dituzu, utziak, zikinak, jendea zirikatzen dute, atsekabea eta samintasuna igartzen dituzu beren aurpegietan, hutsunea eta bakardadea… (isilunea)… Zer gertatzen zaie? Nolatan daude hain triste? Beldur diezu eta atzera itzultzen zara. Hala ere, zure buruari galdetzen jarraitzen duzu. Zer gertatzen zaie? Zer egin ahal dut? Zer edo zer egin beharko dut…

Korrika etxeratzen zara, ez diozu pentsatzeari uzten, gazte gaixoak! Eta nik, zergatik daukat honen zorte ona? Katedralaren aurretik pasatzen zara, itxita dago eta iraultza gertatu zenetik debekatuta dago sartzea. Hala ere,  lehen ikusitakoaren eraginpean sartzen zara eta Jaungoikoari galdetzera ausartzen zara. Zergatik onartzen duzu hau guztia? Zergatik ez duzu ezer egiten? … (isilunea)  Gaua da etxera iristen zarenerako, baina zure barnean argi batek distira egiten du, intuizioa, galdera guztien erantzuna… “zeu sortu zaitut, behar zaitut”.

Gau horretan ez duzu lorik egiten, aurpegi guztiak biraka dabiltza zure buruan, kale bakoitzeko galderak… ilunabarra ere bai, baina batez ere intuizio hori: “behar zaitut”.

Gogoeta:

Zeure buruari galdetzera bultzatu zaituzten horrelako gauzak edota egoerak, ikusitakoak gogoratzen dituzu?

Egoera askotan gure beharra izaten dute (pobrezia, ekologia, familiaren maitasuna, ikasgelako giro ona, etorkinak, hiritartasuna, ondo prestatzeko erantzukizuna, auzoa, arazoak dituzten lagunak…)

Badago baten bat  konpromisoa edo parte hartzea eskatzen dizuna?

MOTA   Erlaxazio progresiboa

MUSIKA   Enchantament 2

NOLA EGIN

Eseri eroso aulki batean, hankak gurutzatu barik. Egin, astiro, arnasketa sakon bat. Orain berriro. Gero, txandaka, gihar batzuk tenkatu eta erlaxatu. Hori egin ostean, giharra tenkatu aurretik baino erlaxatuago egongo da. Arreta giharretan bilduko dugu, nola tenkatu eta nola erlaxatu egiten diren sentituz. Apurka-apurka sumatuko dugu gihar jakin baten tentsioa eta, ondorioz, gai izango gara tentsio hori murrizteko.

Lantzen ari garen giharrak bakarrik tenkatu behar ditugu, ez beste talde batekoak. Ez dugu arnasketa gelditu behar, ezta hortzak edota begiak estutu. Arnastu astiro eta erregulartasunez eta pentsatu soilik tentsio eta erlaxazioaren arteko desberdintasunean. Tentsio bakoitzak 5 bat segundoz iraun behar du; erlaxazio bakoitzak ere, 5 bat segundoz. Zenbatu “1, 2, 3…”

Kontuz ibili behar gara lesioren bat edo giharrak zurrun baditugu. (Denbora gutxi baldin badugu, atalen bat ez dugu egingo)

1. Eskuak. Ukabilak estutu, tenkatu eta erlaxatu. Hatzak luzatu eta gero erlaxatu.
2. Besoak – bizepsak. Bizepsak tenkatu eta gero erlaxatu.
3. Sorbaldak. Atzerantz eraman (kontu handiz) eta erlaxatu.
4. Lepoa (albo batera eta bestera begira). Sorbaldak zuzen eta erlaxaturik, tolestu astiro burua,ahal duzuneraino, eskuinerantz eta gero erlaxatu. Errepikatu gauza bera ezkerrerantz.
5. Lepoa (aurrerantz). Eraman kokotsa bularreraino, gero erlaxatu. (Atzerantz eramatea ez da gomendatzen).
6. Ahoa (luzatu eta atzera egin). Ahoa zabalik, luzatu mihia ahalik eta gehien eta gero erlaxatu ahoaren beheko aldean. Eraman mihia ahoaren atzeko aldera ahalik eta gehien eta erlaxatu.
7. Begiak. Zabaldu ahalik eta gehien eta erlaxatu. Tentsio bakoitzaren ostean, guztiz erlaxatuta geratu behar dira begiak, bekokia eta sudurra.
8. Arnasketa. Hartu arnasa ahalik eta sakonen. Orduan har ezazu apur bat gehiago. Arnasa bota eta arnastu normaltasunez 15 segundoz. Gero berriz bota ahalik eta aire gehien ateraz. Apur bat gehiago. Arnastu normaltasunez 15 segundoz.
9. Ipurmasailak eta izterrak. Luzatu hankak eta altxatu 10 cm. Ez tenkatu sabela, erlaxatu. Zapaldu lurra indarrez; erlaxatu.
10. Sabela. Sartu sabela ahalik eta barruenera; erlaxatu erabat. Atera sabela ahalik eta kanpoenera; erlaxatu.
11. Oinak. Behatzak estutu (hankak altxatu barik); erlaxatu. Altxatu behatzak gorantz ahalik eta gehien; erlaxatu.

AMAIERA: Gorputz osoa sentitu behar dugu erlaxatuta. Eskertu sentipen hori eta gorputz osasuntsua eta biziz beteta duzula.